Bogmaðurinn er frá 22. nóvember til 21. desember.

Elsku bogmaðurinn minn.

Þér eru gefnir svo miklir hæfileikar og þess vegna er svo mikilvægt að nýta þá. Þú ert góður í því sem þú gerir, alveg sama hvað þú tekur þér fyrir hendur.

Það er einhvers konar skipting eða breyting í orkunni í kringum þig en það er þá frekar verið að tala um persónur sem tengjast þér og þú gætir verið að hafa áhyggjur af.

Vertu bara ákveðinn að halda áfram þínu striki. Mögulegt er að í kortunum sé að breyta um húsnæði, skoða nýja möguleika … þó það gæti verið plan yfir næstu mánuði er það samt komið inn í kringum þig.

Það er að koma eitthvað gott í sambandi við vinnu og ef þú ert í prófum (sem er líka vinna) er mjög mikilvægt að sjá það fyrir sér hvaða útkomu þú vilt fá í hverju prófi.

Skrifaðu þá útkomu niður og settu á ískápinn svo frumurnar þínar sjái hvaða útkomu þú vilt ná. Það er líka gott að hafa töluna aðeins hærri en þú býst við, ég get sagt margar sögur af því að þetta hefur virkað.

Þú átt stundum það til að missa máttinn þegar þú ferð inn í stressandi tímabil og hefur ekki aflið til að snúa orkunni þér í vil.

Þess vegna er best fyrir þig að hugsa ekkert fram í tímann. Ástæða þess að maður lamast í augnablikinu eru hugsanir langt fram í tímann eða í augnablikinu — þá finnurðu ekki kraftinn sem þú átt að fá og ert með.

Þú ert töffari í eðli þínu og elskar að geta fært þig til því eins og þú veist sjálfur: Þú ert ekki tré! Þú velur ekki alltaf auðveldustu brautirnar í lífinu því að þitt hjarta er ævintýrahjarta.

Þú ert alltaf að gera góða sögu betri með því að skapa eitthvað spennandi í lífi þínu en umfram allt eru ómótstæðilegur og sjarmerandi.

Talan átta skiptir miklu máli í maímánuði, talan 16 og 20 líka, dagsetningarnar. Það er mikill kraftur í kringum þessar tölur og yfir þér, eins og vanalega, ertu alltaf heppinn þó það sé á síðustu mínútunni. Til hamingju með það!

Knús og kossar,
Sigga Kling