Vogin er frá 23. september til 22. október.

Elsku Vogin mín, til þess að grípa hamingjuna og finna þessa vellíðan sem segir að þú hafir sigrað eitthvað í lífi þínu þá kemur það fyrir að maður lendir í áföllum en þessi áföll sem hafa verið send eru til þess að hjálpa þér að verða vitrari og sterkari en þú hefur nokkurn tíman verið.

Það kemur svo oft fyrir að maður getur bara hreinlega ekki neitt, andaðu djúpt að þér og trúðu því að þú komist yfir þennan hjalla sem þér hefur verið sýndur. Að trúa og treysta í því býr mátturinn.

Í kringum 21. júlí þegar fulla tunglið sýnir sig þá sérðu að þú hefur gert allt rétt og hefðir ekki þurft að hafa þessar djúpu og erfiðu áhyggjur. Í raun eru það bara hugsanir sem skelfa þig svo æfðu þig í því að setja nýja hugsun inn því að það er nú þannig að þetta ár er árið þitt og sigrarnir verða miklu sætari en ósigrarnir.

Það er verið að beina þér á aðra braut í lífinu og blessa þig með auðmýkt og hagsæld, þú ert svo merkilegur andi og hefur reynst öðrum svo vel og þess vegna muntu sjá birtuna betur en þú gerðir. Ástin býr í trygglyndinu og þolinmæðinni, það er þinn lykill.

Þú lætur ekki fólk komast upp með það að ergja þig eins mikið og oft áður, nýtt fólk er líka að færast til þín því breytingarnar sem eru að gerast hjá þér boða það að þú færð að vita svo ótrúlega margt sem þér hefur verið hulið.

Það verður allt gott með vinnu og verkefni fram undan elskan mín og þá sérstaklega þegar að haustið kemur.

Knús og kossar.
Sigga Kling