Vogin er frá 23. september til 22. október.

Elsku Vogin mín, það er svaka mikill hraði í lífi þínu núna. Þú ert ekki viss hvaða ákvörðun þú þarft að taka í stórum málum eða smáum en að dveljast lengi í þessari tíðni getur haft slæm áhrif á húðina þína, hárið og allt mögulegt.

Eitthvað sé ég sem er að rugla þig í ríminu, þú vilt vera góð við þig og svo annan aðila sem á verulega bágt. Þarna þarftu að fórna þér eða leyfa þessari persónu að bjarga sér sjálf.

Það eru ýmsar eldingar í gangi en þetta er bara stutt tímabil og storminn lægir og sólin skín sérstaklega sterkt með og upp úr fulla tunglinu þann 17. september sem er risatungl og tungluppskera.

Þarna sérðu að þú hefur réttu spilin í hendi þér og alveg hreint frábær spil, þú selur eitthvað, lánar einhverjum eitthvað og skiptir töluvert oft um skoðun í kringum þann tíma og það má!

Andlega orkan þín opnast upp á gátt og þú upplifir ólýsanlega gleði í hjarta og sál. Það er best að fresta því ekki að rífa plásturinn af ef þú tekur þá ákvörðun að setja þig í fyrsta sætið.

Þeir sem eru frír og frjálsir í þessu frábæra merki þurfa ekki annað en að rétta upp litla fingur og opna hjartað … þá er ástin vís. Það sagði mér merkilega kona sem nú er látin, að þú ættir ímyndað að taka hjarta þitt í hönd og fleygja því eins langt og þú gætir og á meðan þú gerir það biður þú um að rétt manneskja grípi það. Þessi hvíti galdur virkar en þú verður að trúa honum.

Ekki er hægt að fullyrða að þú sért löt en letin er svo leiðinleg að fátæktin nær henni og það er þér sannarlega ekki ætlað. Ef enginn framkvæmir það sem þig vantar, gerðu það þá sjálf.

Þetta er sérkennilegur tími alveg til loka nóvember og allt virðist vera að gerast í einu, þetta verður ótrúleg bíómynd.

Knús og kossar,
Sigga Kling