Elsku krabbinn minn, þú ert svo sannarlega búin að breiða út faðminn gagnvart lífinu. Þú tekur á móti hinu jákvæða og hinu neikvæða með miklu betra jafnvægi.

Þú ert með skýra stefnu að einhverju leyti og fólk þráir að vera inni í þeirri orku sem þú ert að gefa frá þér. Þú finnur nýja leið og færð betri útkomu og jákvæðari svör. Apríl er að gefa þér ómælt sjálfstraust og sterka hugarorku. Þú gætir spáð í það að vilja fara á námskeið eða í skóla eða að kenna einhverjum það sem þú kannt, þú værir allan daginn góður kennari því hefur frábæra skipulags hæfileika og þú gefur ekki neitt eftir.

Þú dettur oft í þá hugsun að þeir sem eru næstir þér skilji þig alls ekki og rífa þig frekar niður heldur en að byggja þig upp. Taktu vel eftir þessu vertu meðvitaður um þetta því þau eiga eftir að finna að þú ert komin til að sjá og sigra.

En góður slatti af þolinmæði á lífssalatið er mjög gott í kringum sólmyrkvann þann 8 apríl og dagana í kring og líka í kringum spennuna sem er í kringum síðustu dagana í apríl.

Þá skaltu frekar losa þig við pirringinn með því að fara niður á sjó og öskra úr þér lungun eða fá útrás á einhverju öðru en fólki, þó að þér finnist það eiga það skilið.

Það er algengt að þið talið upphátt við sjálfa ykkur og rannsóknir sýna að það sé mikið gáfumerki. Gerðu jafnvel meira af því þennan mánuðinn,  því að þá færðu svörin svo skýr, eins og þú værir á miðilsfundi.

Ekki reyna að sigra allt á korteri heldur byggðu undirstöðurnar þínar vel hvort sem að það sé tengt ástinni eða lífinu því verður það hús sem þú munt reisa á þeim undirstöðum fullkomið.

Knús og kossar.
Sigga Kling