Nautið er frá 20. apríl til 20. maí.

Elsku nautið mitt.

Þessi mánuður gefur þér óbeislaða og dásamlega útgeislun. Venus er að fara úr fiska- og hrútsmerkinu og beint í nautsmerkið. Það gefur reyndar öllum merkjunum miklu meiri ást og ástartengsl, hlýju og kærleika.

En þar sem Venus er einnig pláneta nautsins og hún er því í merkinu þínu rætast draumar þínir í sambandi við ástina.

Ef ástin er ekki að halda utan um þig og gera þér gott (og þú ert búið að vera að berjast fyrir því að allt sé gott og blessað!) getur þessi orka líka skapað að sambönd slitni ef sú ást er ímyndun og/eða ekki til staðar.

Mikið réttlæti einkennir og tengist þessu tímabili sem þú ert að ganga inn í. Í þessu öllu þarftu að skilja að móðir jörð er að kalla á þig. Þú þarft að finna hjartslátt jarðarinnar og tengja þig við hana.

Í kringum 11. júní er tunglið fullt og þá er eins og það komi jarðskjálfti hjá þér. Í jarðskjálfta stjórnar maður litlu svo þú þarft að átta þig á að það sem ríkir hjá þér á þessum tíma er til þess þú sjáir allt í betra ljósi og tengir þig hærra við þinn andlega mátt.

Passaðu þig að setja ekkert á Internetið eða í skilaboð sem aðrir gætu séð því þegar þú fyllist reiði (hvort sem hún er réttlát eður ei) getur fljótfærnin gripið um hálsinn á þér.

Þó fólk hafi brugðist þér í fortíðinni eða jafnvel núna er ástæðan fyrir því að það á að herða þig. Þó þú sjáir að þú hafir val um hverjir eru í lífi þínu er þetta tengt ástinni, einhver ástartenging.

Þú þarft að nota vissa dáleiðslu til að koma persónunni út svo hún búi ekki í heilanum á þér með sjónvarp og síma. Þú sérð þessa manneskju koma til þín í huganum, segir nafn hennar og þakkar henni fyrir allt sem hún hefur gert fyrir þig.

Þó hún hafi gert eitthvað hræðilegt skiptir þetta samt miklu máli; að þú þakkir henni fyrir, segir nafnið hennar og núna megi hún fara. Svo sérðu hana fyrir þér labba í burtu þar til hún er orðin að svörtum depli. Það getur verið að þér finnist þetta barnalegt en þetta virkar!

Þú hefur þann kraft að geta stýrt lífi þínu í rétta átt og aukast ásmegin eftir því sem líður á júnímánuð og ef eitthvað er blessun er blessunin þín.

Knús og kossar,
Sigga Kling