Tvíburinn er frá 21. maí til 20. júní.

Elsku tvíburinn minn!

Þú ert langskemmtilegasta merkið en þú getur líka fallið niður í gjótu og orðið dökkur í sálinni gagnvart sjálfum þér.

Þú mátt ekki staldra of mikið við þar en núna er akkúrat landið að gefa þér svo mikla birtu og svo svakalegan kraft að mikilvægt er að þú lærir inn- og útöndum því öndun er eitt það merkilegasta sem þú ættir að læra. 

Til dæmis að anda djúpt inn … telja hægt upp á tíu í huganum … og anda frá þér. Það þarf ekki allt að vera svo flókið, bara gera einfalda hluti er langbest fyrir þig.

Þessi mánuður er sannkallaður undirbúningstími. Hann lætur þig mæta hindrunum til að koma þér á réttan stað. Þú þarft að vita af innlifun hvar þú ert og hvert þú vilt fara í raun og veru.

Þú ert með fjölbreyttan listamannahuga og það sem þú tekur þér fyrir hendur VERÐUR að vera skapandi. Einnig skiptir miklu máli að þú stjórnir þínum tíma, vinnir ekki frá 8-17. Þó statusinn sé góður í þeirri þá skaltu spyrja þig: „Er ég hamingjusamur eða hamingjusöm í þessari vinnu?“ því lífið er of stutt til að sóa því í leiðinleg sambönd eða þreytandi vinnu sem gefur þér ekki neitt.

Það skiptir ekki máli hversu mikið þú færð útborgað því þegar þú elskar hvað þú gerir kemur allt til þín sem þú þarfnast. Þá fyllist sál, hjarta og hugur ánægju. Ég sé fólk koma til þín sem hjálpar þér eða gefur þér eitthvað, því útgeislun þín nær yfir fjöll og firnindi.

Þú hefur í höndum þér að geta gert gráan stein að gullstein, þú hefur svo góða sölumannshæfileika að þú gætir selt norðurljósin!

Það er mikilvægt að daðra við lífið og alla og setja syngjandi tón í röddina þína því þá muntu hanna líf þitt eins og þú myndir hanna stórfyrirtæki. Grunnurinn þarf að vera góður og þeir sem tengjast þér þurfa að vera aflmiklir og hafa skýr markmið.

Þú þarft að ákveða strax hvernig þú ætlar að láta þau markmið rætast, skrifaðu þetta niður og gott væri að gera það í kringum fulla tunglið sem er þann 12. maí. 

Taktu svo þetta blað, brjóttu það saman og settu það bara einhvers staðar og svo byrjar galdurinn að gerast.

Knús og kossar,
Sigga Kling