Elsku Tvíburarnir mínir, í kringum sólmyrkvann merkilega sem er þann 8 apríl gefur þér það að hugur þinn, andi og allt saman sigrast á allri hræðslu.

Ef að einhverjir óvinir, að þér finnst, hafi verið í kringum þig eða að tala illa um eða við þig, þá víkur allt burt frá vegi þínum og þú hugsar afhverju var ég að láta þetta ergja mig svona mikið því það tók því ekki. Þetta er mikið stærra en að ég sé að tala um einhverja eina manneskju eða einhvern einn atburð, þú hendir út þeim vondu venjum sem við öll höfum að einhverju leyti.

En þarna færðu gleði sjálfsagans og það ekkert eins fallegt og tvíburi með sjálfstraust, sjálfsaga og bros. Það er viss undirbúningur í gangi, þú gætir byrjað á því að sanka að þér hlutum eða taka nær hjarta þínu fólk sem þér datt ekki í hug áður að væri mikilvægt, og þegar á líður þá veistu afhverju.

Þegar við fæðumst hér á jörðina þá erum við með verndarengla eða vissa vernd sem við erum búin að kjósa okkur áður en við fæðumst. Svo núna ertu með englaher, verndarengla og varðmenn og sú orka varir í marga mánuði. Þinn mínus er að þú felur þig og dregur þig í hlé, sérstaklega um hávetur, og þá getur kvíðinn nagað hvert bein í þér.

En núna gerast hugmyndir þínar með hraða ljóssins, svo taktu eftir því að þér líður betur í hjartanu en á sama tíma í fyrra. Það verður mikið um alls kyns boð, veislur og svoleiðis og þú skalt mæta í þær allar ef þú getur. Því að krafturinn er líka fólginn í tengslanetinu þínu og þessari smitandi gleði sem þú gefur frá þér.

Þú skalt líka freistast til að leyfa letinni ná tökum á þér, því að leti er sexý og góð til að hita sig upp fyrir skemmtilegar áskoranir. Eitt af táknunum sem þú færð um þessa nýju tíma er að þú sérð endurtekið sömu tölurnar, jafnvel 111, 444 eða einhverjar svoleiðis tölur sem eru í þrennu. Líka á þetta við alls konar tölur sem myndast aftur og aftur hjá þér.

Þetta er svo merkilegt og þú skalt skoða hvað þú sért eða hver hringir í þig eða hvað gerist, rétt eftir að þessar tölur birtast, þetta er tíminn sem þú glaðvaknar. Þú getur leikið þér við ástina, en þér þarf að vera alvara í þeim leik og ekki leika þér að ástinni. Þú ert svo sannarlega heppinn.

Knús og kossar.
Sigga Kling