Tvíburinn er frá 21. maí til 20. júní.

Elsku tvíburinn minn!

Það er sko alveg hægt að segja að lífið hafi verið út og suður á síðustu vikum. Þú ert búinn að að vera að keyra þig áfram og veist ekki alveg hvaða leið þú ert að fara.

Þó sumarið sé þinn tími get ég líka sagt að sá tími sé búinn með þeirri vitleysu sem hefur ríkt. Nýr kafli hófst nefnilega hjá þér þann 1. júlí og frá því tímabili ferðu að finna að þú hefur réttu tökin á því sem þú ert búinn að vera að stússast í.

Þú færð betri yfirsýn og fullvissu um að allt muni ganga eins og í sögu héðan í frá. Þú þarft líka að vita að sögur þurfa að vera spennandi og eitthvað þarf að læra af þeim … ekki síst að maður vilji lesa söguna!

Í því sambandi er ég ekki að segja að allt verði slétt og fellt og þú þurfir ekki að taka á honum stóra þínum heldur er ég að segja að fram undan sé skemmtilegur kafli með alls konar ívafi sem spinnst inn í lífssöguna þína.

Það verður sem sagt í frásögur færandi þegar þú vilt segja frá einhverju skemmtilegu. Það eru gerðar miklar kröfur til þín og of mikils af þér ætlast. Þetta kann að vera stressvaldur en ef þú hugsar hvorki um gær- né morgundaginn verður þetta allt í lagi.

Það veldur þér nefnilega þreytu að hugsa fram í tímann og þunga að hugsa aftur í tímann. Þú ert núna á því tímabili að þér líður vel, þá skemmtirðu þér og leysir gáturnar; færð fólk í kringum þig í lið með þér.

Góður leiðtogi þarf að vita að hann á ekki að ana á undan heldur vera með fólkið í kringum sig svo það komi með manni. Þetta verður frábært tímabil hjá þér!

Knús og kossar,
Sigga Kling

Spáin er stutt og snörp yfir sumartímann elsku hjartans vinir og hún lengist þegar dagar fara að styttast!