Krabbinn er frá 21. júní til 22. júlí.

Elsku krabbinn minn.

Líf þitt að undanförnu hefur verið eins og þú hafir tvo þotuhreyfla á bakinu. Núna kemur smá tími í rólegheitum og leyfðu þér að gera eins lítið og þú getur til að kyrra hugann.

Þú átt til að vera töluvert á undan þér og skipuleggja og plana ferðalög og hitt og þetta. Þú þarft því að taka hellisbúann á þetta og hlusta á þögnina til að tóna þig niður.

Það er á þeim stundum sem kraftaverkin gerast en tilfinning þín segir þér að þú þurfir að vera þarna að redda þessu og plana og plana.

Núna er bara planið að hlusta ekki á neitt, hvíla hugann og þegar þú byrjar á þessu fer líkaminn að lækna sig sjálfur, hreinsar burtu streituna og spennuna sem hefur verið í uppbyggingarfasa hjá þér. Þá finnurðu hvernig vellíðanin hríslast um þig allan. Þetta er trixið fyrir þig í þessum mánuði.

Það er mikil orka í kringum jarðarberjatunglið sem hefst upp úr 11. júní og það væri besti tíminn fyrir þig að kalla fram frið og ró í hjartanu.

Svo stendurðu upp kraftmikill og endurnýjaður og getur tekist á við allt sem hefur verið að valda þér ónæði. Mikilvægustu dagarnir þínir verða 7. júní, 11. júní, 24. og 27. júní.

Eitthvað er að koma til þín sem þú hefur beðið eftir. Ef þú vilt gera góða samninga skaltu punkta hjá þér dagana hér að ofan. Ég sé hjá þér örlitla hræðslu við ástina en Venus er ríkjandi hjá þér til 4. júlí svo eitthvað spennandi gæti verið á döfinni í þeim málum ef þú nennir því. Þetta gæti líka verið vegna þess að leti er sexý sé hún ekki um of!

Ef þú ert að spá í húsnæði eða ætlar að flytja þig um set út af einhverju, byggja upp eitthvað nýtt eða þess háttar sem gæti tengst vinnu, nýjum skóla eða einhverju sem þú verður ægilega spenntur yfir … ekki bíða eftir að eitthvað gerist heldur láttu það gerast.

Þegar við erum að leita að hamingjunni heyrum við ekki þegar hún bankar. Þetta verður góður mánuður. Þú laðar að þér dýr og núna er rétti tíminn til að fá sér kúrufélaga. Ef þú hefur verið að spá í því kemur það upp í hendurnar á þér.

Ég vil líka nefna að þeir sem eru að spá í ástinni verða að opna faðminn og hjartað upp á gátt og leyfa sér að fara í ástarferðalagið. Það á nefnilega til hjá þér að ef þú ert spenntur fyrir einhverjum ferðu bara heim og hættir við að ná þessum tengslum.

Knús og kossar,
Sigga Kling