Nautið er frá 20. apríl til 20. maí.

Elsku nautið mitt.

Auðvitað hefur verið alls konar pirringur í kringum þig undanfarið en það er bara því þú leyfir honum að fara inn í veröldina þína. Það eina sem getur drepið þig eru hugsanir þínar.

Þú ert algerlega að fara að slá í gegn fyrir sjálfan þig og þú dreifir óvenjulegum blæ í kringum þig þannig fólk fer að hugsa: Hver er þetta? Hvernig týpa er þetta? En enginn mun komast að því vegna þess þú lætur ekki alla vita af öllu.

Þú ert þagmælskt um hluti sem geta verið eitraðir því slúður er eitur. Slúður á heima hjá þér ef þú slúðrar og dæmir þú aðra verður þú dæmt. Við erum ekki sett á jörðina til að dæma aðra.

Ekki að ég sjái að þú sért slúðrari, ég er t.d. naut sjálf og ef ég heyri slúður í kringum mig, stoppa og sting því aftur upp í mig (og skila því helst í klósettið ef ég get!). Það er óvenju mikil ást í loftinu og hefur verið.

Ekki að þú takir endilega eftir því en ef þig langar í ást skaltu leyfa því að gerast. Þú verður samt að gefa leyfi, ég leyfi að… það er ekki svo auðvelt að stela hjartanu hjá þér.

Þetta verður svo sterkur mánuður hjá þér. Meyjutunglið í kringum 14. mars gerir það að verkum að það er eins og þú hafir sett þig sjálft í hreinsun hjá einhverri efnalaug, verstu hnökrunum verður létt af þér sem þú hefur safnað saman og gleymt að henda.

Þú fyrirgefur þér sjálfu sem og öðrum. Þú þarft ekkert að ræða við þann sem hefur stigið á þig heldur talaðu það út í andrúmsloftið. Tala það út í kraftinn í kringum þig.

Ég fer t.d. niður að sjó sem er svo máttugur og tekur við því sem ég þarf að henda. Það er viss jónun sem á sér stað niðri á strönd og sjórinn er læknandi fyrir líkama og sál.

Hentu því frá þér sem þjónar þér ekki eins og þú sért að fleygja bolta eða fleyta kerlingar, farginu verður þar með af þér létt. Þegar þú gerir eitthvað af þessu tagi byrja að læknast óútskýrðir verkir, gigt eða hvað þú vilt kalla það.

Þegar okkur líður illa fara nefnilega að myndast bólgur í líkamanum og valda veseni. Ég ætla annars að hrópa ferfalt húrra fyrir þér því það er svo sannarlega hægt að segja að þinn tími sé kominn. Taktu á móti því með því að breiða út faðminn og segja TAKK!

Knús og kossar,
Sigga Kling