Tvíburinn er frá 21. maí til 20. júní.

Elsku tvíburinn minn.

Í þér er viss óeirð og þú veist ekki hvort þú eigir að hlakka til eða kvíða fyrir, svo örar eru skiptingarnar í lífi þínu. Það er svo mikilvægt þú náir að slaka á og hvíla þig.

Ekki sofa – slaka á! Án þess að vera að hugsa allan hringinn og í öll horn hvort hitt eða þetta gæti orðið, það er allt of mikið af hugsunum.

Þetta er mjög merkilegur mánuður fyrir þig og þegar fulla tunglið birtist þann 14. er tunglmyrkvi í þokkabót, það er sko eins og fullt tungl á sterum! Það getur haft mikil áhrif á andlega líðan þannig vertu undirbúinn fyrir þetta tímabil.

Ekki hafa áhyggjur af neinu, slaka á, þetta reddast. Settu frið í kringum þig og þá magnarðu upp sjálfstraustið og kraftinn til að geta hvað sem er. Fljótfærni einkennir fyrri hluta mánaðar og þú ferð smá út í horn. Betra er að þegja en segja eitthvað sem gæti komið þér illa seinna. Þetta er líka því þú ert tilfinningaríkasta merkið og bara á einum degi ertu eina mínútuna hress og kátur og svo snýst það á næsta klukkutíma.

Það er alltaf gaman að vera í kringum ykkur tvíburana og í mars verður fjörið því óendanlegt! Einnig áttu óteljandi aðdáendur einn daginn en þann næsta finnst þér allir vera á móti þér.

Margt af þessu er bara ímyndun hugans. Þú þarft að temja þér ákveðna öndunartækni; anda djúpt og telja upp að átta í huganum áður en þú andar frá þér. Finna út hvaða matur eða drykkir fara illa í þig því þú ert ofurnæmur á allt, hávaða, ljós og allt mögulegt.

Kannski finnst þér þetta ekki hljóma spennandi en ástæðan er sú að viss bylting er að eiga sér stað í orkunni þinni. Þegar þú kemur út úr þessum mánuði og þegar líða tekur á vorið er eins og allt sé fullkomið. Eins konar hindrunarhlaup og þegar líður á og þú ert búinn að hlaupa í nokkurn tíma kemur í ljós að þú ert sigurvegarinn, keppni sem þú sást endalokin ekki endilega fyrir þér en þú tekur bikarinn. Þetta er bara til marks um seiglu þína. Þú getur verið fljótur að fara niður og sjá allt svart en það er líka ímyndun hugans. Mörg tilboð bíða þín á næstunni, margir vilja fá þig til liðs með sér af einni eða annarri ástæðu.

Haltu beint áfram, ekkert vera að stoppa í pollum og ef þú dettur í einhvern poll er ekki skammarlegt að detta en stattu strax upp aftur og haltu áfram. Sigurinn er fólginn í að ná því takmarki sem þú ert löngu búinn að ákveða.

Mátturinn í öllu er að gefa þér mikið og í marsmánuði hriktir töluvert í öllu því orkan er svo há og tíðnin skerandi. Allt mun þó fara vel að lokum!

Knús og kossar,
Sigga Kling