Vatnsberinn er frá 20. janúar til 18. febrúar.

Elsku vatnsberinn minn.

Það eru góðir hlutir að gerast hjá þér. Þér líður samt ekki alveg nógu vel með það sem þér er fært frá alheiminum.

Allt er svo bjart og glæsilegt í kringum þig en mig vantar þig í sólskinsskapi sem fer þér svo vel.

Þó þú getir ekki sinnt öllu sem þú óskar skaltu alls ekki gera þá kröfu til þín að gera það. Gerðu bara eitt í einu og það verður allt á þeim tíma sem það á að gerast.

Því þegar þú ætlar að þóknast öllum, gleðja alla, hafa allt á 200% hreinu þá missirðu máttinn og gleðina og verður eins og strandað skip. Þetta eru skilaboðin til þín: Taktu eitt í einu, þá ertu eins og skip sem siglir hárrétta leið.

Þetta er mánuður tilfinninga og þú tilfinningaríki vatnsberi ættir að geta átt besta tíma lífs þíns akkúrat núna. Ekki gera bara allt í einu.

Í ástarmálunum ertu ekki alveg viss hvort þú hafir veðjað á rétta manneskju eða hvað þú eigir að gera. Það er ofsalega gott trikk fyrir þig að hreinlega spyrja: „Hvað á ég að gera í ástarmálunum?“

Þá færðu tilfinninguna strax á eftir. Ef þungi kemur yfir sólarplexusinn er það nei og ef þér er létt er það já. Svona geturðu spurt að öllu en þú verður að trúa því. Að trúa og treysta er lykillinn og trúin flytur fjöll og gerir hið ómögulega mögulegt.

Ekkert getur stöðvað þig því þú heldur í hönd hamingjunnar og hin höndin heldur í viljastyrkinn. Taktu skýra ákvörðun í öllu sem þú gerir, ekkert getur stöðvað þig!

Knús og kossar,
Sigga Kling

Spáin er stutt og snörp yfir sumartímann elsku hjartans vinir og hún lengist þegar dagar fara að styttast!