Vatnsberinn er frá 20. janúar til 18. febrúar.

Elsku vatnsberinn minn.

Það er svo algengt hjá þér að þú sért að leita að sjálfum þér. Þú heldur jafnvel að þú finnir þig uppi á fjalli með munkunum í Indlandi, eða þú ferð í sveit og verður þar um tíma.

Kannski ferðu að míkródósa sveppi og heldur að þar sé sannleikann að finna. Ekkert af þessu er rétt, því allt sem þú þarft er inni í hjarta þínu.

Hvar sem þú leitar að þér sjálfum er að finna hjá þér og þannig geturðu lagað hlutina, það býr í hjarta þínu. Svo steinhættu að leita að sjálfum þér því þú ert fundinn!

Á heimili þínu skaltu byggja svolítið musteri. Þú ættir að nýta þér að þú ert svolítill hellisbúi, þarft að fá frið einn og með sjálfum þér. Þetta þarf ekkert að vera stórt svæði heldur bara þitt svæði.

Þú ert svo andlega þenkjandi og ert alltaf að hlusta á einhverja andlega leiðtoga eða slíkt og ert að uppfæra hugsanir þínar og koma þeim og heilanum á hærra plan.

Þetta mun allt ganga svo ofsalega vel hjá þér. Þú ýtir frá þér einhvers konar fíknum sem hafa stoppað um stund hjá þér og mundu að þær geta verið af ýmsum toga; kaupfíkn, matarfíkn, ástarfíkn og svo framvegis.

Þú sleppir því sem ekki á við þig og getur gert það auðveldlega. Það er margt sem mun ávinnast núna. Fyrir þá sem eru að skoða ástina er eitthvað sem er nýbúið að gerast sem er í vinnslu.

Ef sú persóna flögrar í huga þinn skaltu taka nauðsynleg skref til að nálgast hana. Ef það er ekki komið á hreint, sama hvers kyns þú heillast af, kallast það jafnrétti.

Athuga skal að kallarnir okkar geta verið aðeins utan við sig í tölvunum eða í áhugamálunum og gleyma kannski að hringja.

Hvað með það, þú hefur engu að tapa – bara rétta út höndina og athuga hvort tekið verði í hana á móti. Hræðsla á nefnilega ekki heima hjá þér, sérstaklega ekki í sambandi við ástina.

Þú ert svo kærleiksríkur og vel máli farinn, nýttu þessa hæfileika til að hafa áhrif á þá sem þú vilt hafa nálægt þér. Þetta er vinningstímabil sem er að fara í hönd.

Knús og kossar,
Sigga Kling