Vogin er frá 23. september til 22. október.

Elsku vogin mín!

Það er svo mikilvægt fyrir þig að mynda huglæga vernd í kringum þig. Ég set alltaf ákveðna vernd yfir mig þegar ég fer út úr húsi, kalla á engla og alla sem geta hjálpað þegar ég er að fara í stressandi aðstæður.

Ég set líka vernd yfir bílinn minn því allt gefur frá sér tíðni; dýr, hlutir, allt líf svo þú þarft að setja góða orku í allt sem í kringum þig er. Það er alls konar í gangi.

Þú getur farið inn á heimili þar sem þér líður illa þó allt sé þar svaka flott og fágað. Kannski er um að ræða leiðindi og/eða rifrildi sem enginn sér.
Það sést ekki hvers konar týpa þú ert fyrr en á reynir.

Ástæðan fyrir þessu er að ég minnist á verndina í upphafi spárinnar er sú að þú tekur inn í hjartastaðinn einhvers konar slúður eða lygi.

Þú þarft að vita að það tekur klukkustund eða tvær að koma þessum steini í burtu sem þér finnst hafa lent á þér.

Ekki svara einu, ekki gera atlögu að þessu og biddu fólk um að vera ekki boðberar illra tíðinda. Einu sinni gekk slúðursaga um bæjarfélagið mitt að krökkum væri hleypt inn í húsið mitt til að horfa á klámmyndir!

Ég fékk alveg áfall en upphafið að því rugli var að barnungur sonur minn hafði hleypt krökkum inn og þau sáu gömlu stytturnar frá Kúnígúnd sem hafði verið skrifað á líffærin með silfurlitum tússpenna.

Ein fjöður orðin að fjórum hænum. Ég hefði aldrei getað stoppað þetta slúður með því að segja eitthvað því suma vitleysu stopparðu ekkert fyrr en þú nærð að blása henni frá þér.

Þegar þú hefur masterað þetta getur ekkert bitið þig í hælinn og þú nærð skapandi og skemmtilegum áföngum. Nýtur þess að vera í merki sem færir þér gæfu og gengi.

Knús og kossar,
Sigga Kling

Spáin er stutt og snörp yfir sumartímann elsku hjartans vinir og hún lengist þegar dagar fara að styttast!