Vogin er frá 23. september til 22. október.

Elsku Vogin mín, þér hefur fundist þú dálítið óörugg undanfarið og oft fengið eins og þyngsli yfir brjóstkassann eða magann og ekki vitað út af hverju þú ert að upplifa þetta óöryggi.

Ástæðan er m.a. sú að þú hefur ekki verið að gefa þér nógu mikinn tíma til að efla líkama og huga, það er svo margt annað sem virðist brenna á hjá þér svo nú þarftu að leyfa þér aðeins meira kæruleysi, meiri hvíld, en þú ert nú alls ekki löt en skoðaðu það að leti er sexý!

Þessi mánuður sem þú ert að stíga inn í kemur með til þín á silfurfati það sem þú þarfnast og þá sérstaklega ef þú sleppir tökunum og stjórnar engu. Þú þarft samt að vita að enginn er ómissandi og stundum finnst þér að þú þurfir að vera alls staðar með öllum en stundum er bara best að taka heimapúkann á þetta. Þú heillast af öllu sem viðkemur lífinu og átt eftir að ferðast bara hreinlega út um allt, þig dreymir um draumaferðir. Þú verður beðin um eða færð upp í hendurnar eins konar verkefni sem tengist ferðalögum, hvort um ræðir vinnuna þína eða einhverju öðru.

Þetta verður allt mjög spennandi í kringum það og þú vekur mikla athygli. Þeir sem ekki detta í ferðagírinn þurfa ekki að hafa áhyggjur því þú ert svo skemmtileg og aðlaðandi og fólk hópast hreinlega að þér. Þú virðist þekkja fólk sem er svo ólíkt í aldri og öllu saman en alls staðar smellurðu þar inn. Ég ætla líka að segja þér að þú þarft að skrifa niður stikkorð. Þú hefur rithöfundarhæfileika og jafnvel blundar rithöfundur í þér.

Þú skrifar niður punkt og punkt og færð send svör við þeim ráðgátum sem þú óskar – að skrifa spurningarmerki fyrir aftan spurningu er góð regla. Þú ættir að vera stolt af sjálfri þér, stolt af ástinni, og til að ástin sé í öllum litum þarftu að treysta henni og að því ef þú efast er ástin ekki traustsins verð. Þetta verður fullkomin tími þó rólegheitin séu ekki alls staðar.

Knús og kossar,
Sigga Kling