Meyjan er frá 23. ágúst til 22. september.

Elsku meyjan mín.

Þú ert eitt af þeim flugheppnu fjórum merkjum sem er að fara í umbreytingu, yfirhalningu og ferð að taka á móti svo mörgum gjöfum frá mættinum í öllu.

Þetta er vegna þess að Neptúnus skreið yfir í hrútinn og hann hefur ekki verið þar í 140 ár! Þú munt græða svo mikið á þessari plánetustöðu. Þú eflist líkamlega og tekur þig á að einhverju leyti ef eitthvað vantar upp á þar.

Þegar það byrjar að þróast fylgir náttúrlega hugurinn með – þú verður miklu fljótari að hugsa hvernig þú kemur þér í eitthvað sem þú vilt eða alveg sama hvað þér dettur í hug.

Gerist sú hugsun hratt og þú framkvæmir, þetta tvennt helst í hendur. Sérstaklega skaltu hafa augun opin þann 13. apríl, og 14. til 17. apríl. Þetta eru mikilvægir dagar. Þú munt finna og skynja lausnirnar.

Þú skalt biðja um áður en þú ferð að sofa að þú vaknir með lausnina eða útkomuna sem þig vantar til að geta farið hraðar og leyst þrautirnar sem lagaðar eru fyrir okkur öll í lífinu.

Einnig sé ég kraft yfir ferðalagi hjá þér sem gæti tengst sveit, sumarbústað eða öðru landi. Þetta verður ekki bara eitthvert ferðalag heldur breytist eitthvað mikið hjá þér, hverju svo sem það er tengt.

Það gæti verið varðandi fólk sem þú hittir eða litlu kraftaverki sem er að gerast í kringum þig. Þú munt fagna svo mörgu. Mundu að það er mikilvægt að fagna – hvort sem það sé vegna einhvers annars í lífi þínu, stöðuhækkun eða ástinni, gefðu þér tíma til að fagna, þá færðu meira af því sem þú elskar.

Venus er að skjóta ástarörvum í kringum þig en þú þarft kjark og þor til að láta sjást þín spor í þeirri deild. Svo þú skalt, hvers kyns sem þú ert eða heillast af, taka upp símann, gera eitthvað í málunum.

Þú hefur engu að tapa. Ekki bíða eftir að eitthvað gerist – láttu það gerast! Opnaðu dyrnar því heimurinn bíður eftir þér.

Knús og kossar,
Sigga Kling